By Burnett Munthali_
Nduna ya za Maboma Ang’onoang’ono, Ben Phiri, yanena kuti anthu a Malawi ayenera kuvomereza kuti zinthu zasintha ndipo dzikoli tsopano likugwiritsa ntchito ndondomeko yopereka mphamvu kwa anthu (decentralisation) ngati njira yoyendetsera ntchito za chitukuko.
Phiri wanena izi poyankha mafunso ochokera kwa aphungu a Nyumba ya Malamulo okhudza momwe ntchito za chitukuko zikuyendera m’madera, kuphatikizapo ntchito yomanga misika komanso momwe ndondomeko ya Constituency Development Fund (CDF) ikugwirira ntchito.
Malinga ndi ndunayi, kwa nthawi yaitali Malawi inkayendetsa ntchito zambiri za chitukuko kudzera ku Likulu la Boma (Central Government), koma dongosololi lasintha chifukwa cha ndondomeko yopereka mphamvu kwa maboma ang’onoang’ono.
“Anthu ayenera kuvomereza kuti zinthu zasintha. Tsopano tikugwiritsa ntchito decentralisation ngati njira yoyendetsera ntchito za chitukuko,” adatero Phiri.
Ndunayi yatsindikanso kuti makhonsolo a m’maboma ali ndi kuthekera koyendetsa bwino ntchito za chitukuko pansi pa thumba la CDF, ponena kuti palibe chifukwa chokayikira luso lawo loyang’anira ndi kugwiritsa ntchito ndalamazi.
Phiri wanena izi potsutsa maganizo a aphungu ena omwe akhala akukayikira ngati makhonsolo angathe kuyendetsa bwino ndalama za CDF komanso kuonetsetsa kuti ntchito zachitukuko zikukwaniritsidwa m’madera awo.
Iye wati kupereka mphamvu kwa maboma ang’onoang’ono cholinga chake ndi kulola anthu a m’madera kutenga nawo mbali pa zisankho zokhudza chitukuko chawo komanso kuonetsetsa kuti ntchito zikuyankha zosowa zenizeni za anthu.
