Wolemba: Chisomo Phiri
Mavuto a utsogoleri m’chipani chotsutsa boma cha Malawi Congress (MCP) akuwoneka kuti akulowa m’njira yoti athere kukhoti, pomwe akuluakulu ena omwe kale ankagwira ntchito m’chipanichi apatsa mtsogoleri wachipanichi komanso mtsogoleri wakale wa dziko lino, Lazarus Chakwera, masiku asanu ndi awiri (7) kuti ayitane msonkhano wapadera wa chipani kapena akumane ndi mlandu kukhoti.
Malinga ndi nkhani yomwe nyuzipepala ya The Nation yatulutsa lero, Lachinayi pa 12 November 2026, kusamvana kumeneku kukukhudza kupitiriza kwa Chakwera kudzinena kuti ndi mtsogoleri wa MCP, ndondomeko yosinthanso malire a zigawo za chipanichi komanso ndalama zomwe mamembala akuyenera kulipira kuti apikisane pa zisankho za makomiti a chipani.
Lazarus Chakwera
Anthu omwe apereka pempholi, motsogozedwa ndi yemwe kale anali wapampando wa MCP m’chigawo cha Kumwera, Dennis Nanthumba, akuti nthawi ya utsogoleri wa Chakwera ngati mtsogoleri wa chipani idatha.
Iwo akufuna kuti Chakwera ayitane msonkhano wapadera potsatira Article 39 ya malamulo oyendetsera MCP kuti athetse mavuto omwe akuti sanayankhidwe okhudza utsogoleri komanso kayendetsedwe ka chipanichi.
Izi zikudzutsa funso lofunika kwambiri loti,Kodi Chakwera angapitirize kugwiritsa ntchito mphamvu za mtsogoleri chipani cha MCP nthawi yake itatha popanda mamembala a chipanichi kumusankhanso?.
Pempholi likutsutsanso ndondomeko yosinthanso malire a zigawo ndi maboma omwe MCP ili nawo, pomwe opereka pempholi akufuna kuti ntchitoyi iyimitsidwe.
Akunenanso kuti ndalama zomwe zalengezedwa posachedwapa kuti anthu azilipira akafuna kupikisana pa zisankho za makomiti a chipanichi zichotsedwe, ponena kuti MCP iyenera kaye kuthetsa nkhani za chilungamo komanso kutsatira malamulo ake isanapitirize ndi zisankho zamkati.
Pempholi, lomwe linalembedwa pa 5 November 2026, akuti lidafika kale kwa mlembi woyang’anira ntchito za MCP, Howard Kachipanda, m’maenvulopu awiri otsekedwa omwe analembedwera Chakwera.
Kachipanda watsimikiza kuti analandira maenvulopuwa koma wanena kuti sanawatsegule, motero sangathe kutsimikizira yekha zomwe zili m’pempholo.
Komabe, Nanthumba watsimikiza kuti ndi amene anasaina pempholi m’malo mwa mamembala omwe akufuna kuti nkhaniyi ithetsedwe.
Kuperekedwa kwa masiku asanu ndi awiriwa kuli ndi tanthauzo lalikulu chifukwa opereka pempholi ati ngati utsogoleri wa chipanichi sudzapereka yankho lokhutiritsa komanso lolembedwa pasanathe nthawi yomwe apereka, apita kukhoti loyenerera kukapempha chilungamo.
Izi zingasinthe kusamvana komwe kwakhala kukuchitika mkati mwa chipanichi kukhala mkangano waukulu wazamalamulo wokhudza kumasulira malamulo oyendetsera MCP.
Mkanganowu ukuonetsa kuti MCP ikukumana ndi mavuto akulu okhudza tsogolo la utsogoleri wake, makamaka chipanichi chitagonjetsedwa pa chisankho cha mtsogoleri wa dziko chomwe chinachitika mu September 2025.
M’malo moti chipanichi chiwonetse mgwirizano komanso kukhazikitsa njira zowonekera bwino zomanganso mphamvu zake, tsopano chikukumana ndi mikangano yokhudza wolowa m’malo mwa utsogoleri, kumasulira malamulo a chipani komanso amene ali ndi mphamvu zoyendetsera mabungwe ake amkati.
Mkanganowu ukudzutsanso mafunso okhudza ngati mamembala wamba komanso anthu omwe akhala nthawi yaitali m’chipanichi ali ndi mphamvu zokwanira posankha tsogolo la MCP, kapena ngati zisankho zofunika zikungosiyidwa m’manja mwa atsogoleri ochepa.
Kwa chipani chomwe kwa nthawi yaitali chakhala chikudzionetsa ngati cholimbikitsa mfundo za demokalase, mmene chidzathetsere mkanganowu zidzakhala ngati mayeso aakulu pa nkhani ya demokalase mkati mwa chipani.
Funso lalikulu sililinso loti Chakwera ayitane kapena ayi msonkhano wapadera, koma loti ngati utsogoleri wa MCP ndi wokonzeka kutsatira malamulo ndi kuyankha pa zolakwa zake monga mmene umayembekezera kwa anthu ena.
Kodi Chakwera ayankha pasanathe masiku asanu ndi awiri? Kodi National Executive Committee ya MCP iyankha pempholi? Kodi nkhani yosinthanso malire a zigawo komanso ndalama zolipirira omwe akufuna kupikisana pa maudindo a chipani ziyimitsidwa?
Ndipo ngati nkhaniyi itafika kukhoti, kodi malamulo oyendetsera MCP adzatanthauzira bwanji nthawi ya utsogoleri wa pulezidenti wa chipanichi?
Awa ndi mafunso omwe MCP singathe kungowanyalanyaza.
Kuwerengera masiku kwayamba, ndipo zomwe chipanichi chichite pambuyo pake zingatsimikizire ngati chidzathetse mavuto ake a utsogoleri mkati mwa chipani kapena kulola kuti makhoti alowererepo.
